عمران عيسي،
سوپاس بۆ ئەوی خودای یێ کو ئەم کرینە ئوممەتا باشترین مرۆڤ ل سەر ڕوویێ جیهانێ سەروەرێ مە حەزرەتی موحەمەد (سلاڤ لێ بن). ئەو پێغەمبەرە یێ کو خودایێ مەزن کرییە ڕەحمەت ژ بۆ ئەڤێ جیهانێ. چ پێنڤیس نە شێن ب دڕوستی بەحس ل وەسف و حەژێکرنا وی بکەن. ئەڤ چەند نە یا سەیر چونکی خودایێ ئەڤێ جیهانێ ئەو یێ کری سەییدێ پێغەمبەران. هەلبەستڤانێن مە کوردان ئەڤ چەندە بوومە ب هەست و سۆزن خوە بەرانبەری ئەڤێ پێغەمبەرێ خوشتڤی دیار کرینە. دەمێ ئەم ئێکەم مەوولودنامەیا کوردی د خوینن کو مەلایێ (باتەی) د بێژیت: ئەگەر ئەز خودانێ خوە سێ سەد دەڤ و ئەزمانا بم ب ڕۆژ و شەڤ ئەز بێم بەحس جوانییا تە بکم هەتا ڕۆژا دوماهییێ ئانکو (قیامەت) ئەز هەر نەشێم ب دڕوستی بەحس بکم دەمێ د بێژیت:
من هەبن سێ سەد هەزار ئەزمان و دەڤ
یەك دەمێ غـــافــــل نەمینم ڕۆژ و شەڤ
وەصفێ حوسنا تە ببێژم صوبح و شام
سەد قیامەت دێ بــــچــــن هێژ نا تەمام
هەر وەسا شێخ موحەمەد ئەمینێ حەیدەری وەکی مەلایێ باتەی، دەمێ بەحس وەسفێ سەییدێ جیهانێ دکەت دبێژیت: هندی دونیا هەبت ژ ئادەم هەتا هەتایێ هەر مرۆڤەکێ سێسەد دەڤ و ئەزمان هەبن هەر نەشێن ب دڕوستی بەحس خوشتڤێ مە موحەمەدی (سلاڤ لێ بن) بکەن چونکی ئەو یێ ژ نوورا حەق چێبووی. ل ئەڤێرێ شێخ موحەمەد ئەمینێ حەیدەری ئاماژە ب ئەوێ حەدیسا کرییە ئەڤا ( أول خلق الله نور نبیک یا جابر) هەر چەندە زانا ئەڤێ حەدیسا لاوز دکەن. شێخ ئەمینێ حەیدەری دەمێ د بێژیت:
گەر ژ ئادەم بە حەتا دونیا هەبە
هەر سەرێ ئنسانەک سێسەد دەڤ هەبە
هەر د دەڤ کێ دە هەبە سێسەد زمان
وەصفێ حوسنا تە ب بێژن هەر زەمان
ئەو تو جارا وەصفێ تە ناکن تەمام
لەو ژ نوورا حەق تو چێبوو ئەی ئیمام
هەر وەسا مەلا سیراجەددینێ خەلیلی ژ دەمێ ئەو بەحس ل وەسفێن خوشتڤییا دلان حەزرەتی موحەمەد (سلاڤ لێ بن) دکەت د مەولوودنامەیا خوە دا دبیژیت:
وەصفێ ئەحمد کی ب بێژی هەر زەمان
قەد خلاص ناکن قەلەم زەهر و زمان
دار و بەر گەر تەڤ قەلەم بن هەم حبر
ژێرە چێبن ئاڤ و ڕۆبار و بەحر
جوملە ئێ جنن و مەلەک ئنسان و عام
تەڤ ب بن کاتب حەتا ڕۆژا قیام
قەد نکارن وەصفێ وەجهێ وی بدن
نوور و تیرێژێ کو هەر دەم ژ دچن
ل دوماهییێ وەکی مەلا موستەفایێ مەلا عەلیێ ئیزداری د مەولوودنامەیا خوەدا بێژیت:
خوەش نزانم وەصفێ بێژم لەو نەبی
بەس سەلامێن ڕەببێ عالەم سەر تەبی
ئەم ژ عەشقا جان و دل با خوەش کەلام
هەر بێژن (الصلوت و السلام)
هیچ کۆمێنتەک نینە