ده‌ستپێكێ ده‌ستخۆشيێ ل يانه‌يا دهۆك دكه‌ين كو به‌رده‌وام هزر د هێما و به‌رچاڤكرنا لايه‌نێن ديرۆكى دكه‌ت و دكه‌ته‌ پشكه‌ك ژ درێسێن خو، بۆ وه‌رزێ نوى ژى هه‌مان هزر كريه‌ و ده‌رگه‌هێ ئامێديێ يێ ديرۆكى و نه‌خشه‌ ل سه‌ر دانايه‌، ل ڤێرێ دێ ديتنه‌كا ديرۆكى و راستڤه‌كرنه‌كێ ديار كه‌ين (ئه‌گه‌ر ئه‌ڤ درێسه‌ هاتبيته‌ چێكرن و ئێكلاكرن!)

هه‌ژيه‌ بێژين كو چه‌ندين وێنه‌يێن (نه‌خشه‌يێن) ديرۆكى هه‌نه‌ كو هنده‌ك ڤه‌دگه‌رن بۆ سه‌رده‌مێ ميرگه‌هێ بخو ژى، بۆ نموونه‌ ئه‌ڤ نه‌خشه‌يێ مه‌ دگه‌ل داناى و ل سه‌ر هاتيه‌ نڤيسين (BAHDINAN) يێ سالا 1840 يه‌ ئانكو به‌رى كه‌ڤتنا ميرگه‌هێ ب دوو سالان (1842)، به‌لێ ئه‌ڤ نه‌خشه‌يێ ل سه‌ر درێسى هاتيه‌ دانان مه‌ دوو تێبينى ل سه‌ر هه‌نه‌ :

1_ نه‌خشه‌ نه‌ يێ كه‌ڤنه‌ و يێ سه‌دێ بيستێ يه‌.

2_ ئه‌و نه‌خشه‌ مێژوونڤيس (مه‌حفووز عه‌بباسى) بۆ په‌رتووكا خۆ (إمارة بهدينان العباسية) بكارئينايه، له‌وما وى په‌يڤا (العباسية) ل سه‌ر نه‌خشه‌ى زێده‌كريه‌، و ئه‌ڤ په‌رتووكه‌ ل سالا 1969 هاتبوو چاپكرن، هه‌بوونا په‌يڤا (العباسية) دێ هوسا ڕامانا ميرگه‌هه‌كا بنيات عه‌ره‌بى ده‌ت كو د بنیات دا چ بنه‌مايێن ديرۆكى بۆ نينه‌ و بتنێ هنده‌ك نڤيسه‌ران هه‌ولدايه‌ بنه‌ره‌ها ميرگه‌هێ بگه‌هيننه‌ عه‌بباسيان!، له‌وما گه‌له‌كا فه‌ره‌ ئه‌و نه‌خشه‌يه‌ بهێته‌ راستڤه‌كرن و ئه‌و په‌يڤ ل سه‌ر بهێته‌ لادان، ئه‌ڤجا چ نه‌خشه‌يێ سالا 1840 بهێته‌ دانان، يان ئه‌و نه‌خشه‌يێن بتنێ ناڤێ به‌هدينان ل سه‌ر هه‌ى كو ل سه‌ر نه‌خشه‌يێن ويلايه‌تا مووسل هه‌ين، يان هه‌ر هێمايه‌كێ ديتر يێ گرێداى به‌هدينان بيت (بۆ نموونه‌ قوبه‌هان….، هه‌ر چه‌نده‌ درێسه‌كێ وه‌سا هاتبوو پيشاندان، ئه‌گه‌ر ئه‌و ئێكلا نه‌بييت).

دووباره‌ ده‌ستخۆشى بۆ يانه‌يا دهۆك و دگه‌ل داخوازا وه‌رزه‌كێ پرى سه‌ركه‌فتن و ئارمانج و ده‌ستكه‌فت و ناسناڤ.