ل ساڵا 1926؛پشتى سەعید نورسى گەهشتى ئەوێ قەناعەتێ نەشێت خزمەتا جڤاکى و ئیسلامێ دناڤ ژیانا سیاسىی، فندوفێلێن ئەوێ ڕکەبەریا خرش و بێ بەرهەم بکەت، ب تایبەتى پشتى دیتى قوتابخانە و تەکیێن ئایینى یێن هاتین گرتنن ب سەدان مزگەفتێن هاتین گرتن و بووین کوگە و گوڤێن دەواران و بنگەهێن گەنجان، سەعید نورسى دا خۆیاکرن ((اعوذ بالله من الشيطان و السياسية)) و ناڤێ خۆ ژ (سەعیدێ کەڤن) کر (سەعیدێ نوى)، و دا دیارکرن سەعیدێ کەڤن مەلەڤانى دناڤ پێلێن سیاسەتێدا بۆ ماوەیێ دەھ ساڵان پێخەمەت خزمەتکرنا ئایینى و زانینێ دئەوێ ڕێبازێدا کرن هەمى ڕەنج و زەحمەتا ئەوى بەر ئاڤێدا چوون، دیت ئەو ڕێباز گەلەکا ب کوسپ و ئاستەنگە….هەڤرکیا خۆپەرێسى یە ب تایبەتى بۆ ئەوى، چونکى ئەو یا ب مەترسى یە زۆربەیا ئەوێ ژى پیلان، فەندوفێل و درەون و دبیت دڕێکا ئەوێدا مرۆڤ ببتە ئامرازەک دناڤ دەستێن بیانیاندا بێکۆ مرۆڤ هەست پێ بکەن، هەر چاوابیت ئەو کەسێ دهێتە دناڤ مەع مەعا سیاسەتێدا یان دڤێت مرۆڤ بەرەڤانیێ ژ سیاسەتا دەولەتێ بکەت یان دڤێت ل دژى ئەوێ ڕاوەستیت، ئەوى هزرکر ئەگەر ئەو بەرەڤانیێ ژێ بکەت هینگێ ئەو خۆپەرێسى یە، پاشى دبێژیت پاشى ب چو هینیت، دیسان دبێژیت دسەر ئەوێ چەندێ ڕا :” ئەز نەکارمەندێ دەولەتێ مە، نە ئەندامێ پەرلەمانى مە، چ ڕامان بۆ کارێ من یێ سیاسى نامینیت و ئەوان بخۆ ژى پێدڤى ب من نینە، کۆ ئەز سەرێ خۆ پێڤە ب ئێشینم، بەرۆڤاژى ئەگەر ئەز چوومە دناڤ ڕێزێن ئۆپۆزسیۆنێدا و ل دژى دەولەتێ ڕاوەستیام هینگێ دڤێت پەنایێ ببمە بەر هزرێ یان هێزێ، ئەگەر من پەنابر بەر هزرێ هەر پێدڤى بمن نینە، چونکى هەمى تشت ڕون و ئاشکەرانە، هەمى کەس تشتان وەک من دزانن، پێدڤى ب زۆرەویێ نینە، ئەگەر من پەنا بر بەر هێزێ، هینگێ دڤێت خۆ بکەم خودانێ بەرەڤانیکرنا هەر ئاریشەکێ دا بگەهمە ئارمانجا گومان کرى، دبیت هینگێ ئەز بکەڤە دناڤ هزاران شاشیاندا و تووشى سەدان گونەها ببم، چونکى گەلەک گاڕان ب ریخا جێلەکێ توش دبن، وژدانا من ژى ل سەر من قەبول ناکەت ئەز کەسێن بێ گونەھ دقێرێ خۆدا ب کەلینم ب ئەگەرەکێ یان هندەک ئەگەران، ژبەر ئەڤێ چەندێ سەعیدێ کەڤن سیاسەت دجڤاتێن خۆ یێن دنیەوى، خواندنا ڕۆژنامەیا و کێشانا جگاران هەمى ب ئێکجارى بجھ هێلان.

سەعیدێ نوى هەمى گرنگیا خۆ دانا سەر لایەنێ ئایینى و عەقیدێ ، سەعیدى ئەو هەمى دەرفەتێن دۆژمنێن ئەوى ب دژى ئەوى بکارهیناین ژناڤبرن، سەرەڕایى هندێ (6) جاران هاتە دادگەهکرن، دئەڤان هەمى دادگەهاندا هیچ گرووڤەک نەهاتە دیتن تێدا هەڤدژ و مەترسی بیت بۆ سەر دەستهەڵات و ئێمناهیا تورکیا ئەوى دەمى، دگەل هندێدا دەستهەلاتا تورکیا هەست ب مەترسیا پەیامێن سەعیدێ نوى دکر و دزانى ئەوا ئەوان ئاڤاکرى دێ پەیامێن ئەوى ئەوان ژناڤبەت و سەعیدى ژى دزانى ئەوا پەیامێن ئەوى ئاڤا دکەت دێ دەستهەلاتا تورکیا پێکولێ کەت و ژناڤبەت. سەعیدى گەهشت ئەوێ باوەریێ دێ هەمى هەوڵ و پێنگاڤ بێ مفابن ئەگەر نڤشەکێ خودان باوەر و ب دڵ وجان نەهێتە پەروەردەکرن.