د پێنگاڤەکا دیرۆکی دا بۆ ئێکگرتن و ستانداردکرنا راستنڤیسا زمانێ کوردی، ئەڤرۆ رێکەڤتی ٢٤ـی ئیلۆنێ ٢٠٢٥، شاندەکێ هەڤپشک یێ بلند ب سەرۆکاتیا د. داود سلێمان ئەتروشی، سەرۆکێ زانکۆیا دهۆک، و د. دیار عەبدولکەریم سەعید، سەرۆکێ زانکۆیا زاخۆ، و ب ئامادەبوونا ئەندامێن لژنا بلندا پرۆژەی، ب فەرمی “رێبەرێ راستنڤیسا زمانێ کوردی – زارێ کرمانجی ب تیپێن عەرەبی” پێشکێشی د. عەلی تەتەر، پارێزگارێ دهۆکێ کر.

د روینشتنەکێ دا، د. داود سلێمان ئەتروشی، سەرۆکێ زانکۆیا دهۆک، باس ل قۆناغێن پرۆژەی کر و گۆت: “ئەم ژمێژە چاڤەرێی ڤێ چرکەساتێ بووین.” سەرۆکێ زانکۆیێ گرنگیا ستراتیژی یا ڤی رێبەری بۆ پرۆژەیێ نوو یێ ژیریا دەستکرد یا زارێ بادینی ل زانکۆیا دهۆک دیار کر. هەروەسا هندەک پێشنیارێن پراکتیکی بۆ بجهئینانا رێبەری پێشکێش کرن، و سوپاسیا پشتەڤانیا پارێزگاری کر.

ژ لایێ خۆ ڤە، د. عەلی تەتەر، پارێزگارێ دهۆکێ، سوپاسیێن گەرم ئاراستەی هەردوو زانکۆیان و هەمی لایەنێن پشکدار کرن و ئەڤ پێنگاڤە ب “شۆرەشەک” د بیاڤێ زمان و رەوشەنبیریێ دا دا نیاسین. پارێزگاری پشتەڤانیا تەمام یا پارێزگەها دهۆکێ بۆ ڤی پرۆژەی دیار کر و گۆت: “ئەم ب تەمامی پشتەڤانین و دێ ڤی رێبەری بجهئینین. من چەندین نڤیسارێن فەرمی رەتکرینە بتنێ ژبەرکو شاشیێن ڕێنڤیسێ تێدا بوون.” هەروەسا بەڵێن دا کو ئەڤ رێبەرە دێ هێتە چاپکرن، بەلاڤکرن، و ل سەر هەمی سازیێن فەرمی هێتە بجهئینان.

ئەڤ رێبەرە، کو بەرهەمێ پرۆژەکێ هەڤپشک یێ زانکۆیێن دهۆک و زاخۆیە و ب پشکداریا هژمارەکا سازیێن دی یێن رەوشەنبیری هاتیە ئامادەکرن، دهێتە هژمارتن وەکو بنەمایەکێ نشتیمانی بۆ ئێکگرتنا نڤیسینا کرمانجی ل دەڤەرا بەهدینان.