دلڤین حاجی

پەروەردەکرنا قۆتابییان ل قۆناغا بنەرەت کارەکێ هەستییار و گرنگە کو بناغێ کەسایەتی و پاشەرۆژا ئەوانڤە دگریت د ئەڤێ قۆناغێدا زارۆک حەز و شیانێن فێربوونێ یێن مەزن نیشانددەن و گەلەک تێگەهـ و ڕەفتاران ژ دەوروبەرێن خۆ وەردگرن.

ڕێنمایی بۆ پەروەردەکرن و ئاخڤتنا دگەل زارۆکێن ئەڤێ قۆناغێ:

١- چاڤلێکرن و لاسایکرن:زارۆک د ئەڤی ژیدا گەلەک حەز دکەن چاڤ ل مەزنان بکەن و ڕەفتارێن ئەوان لاسایی بکەن لەورا گرنگە دایک و باب و مامۆستا ببنە نموونەیێن باش بۆ ئەوان.

٢- حەزا زانینێ و پرسیارکرن:زارۆکێن ئەڤێ قۆناغێ پرسیارێن بەردەوام دکەن و حەز دکەن ل دوور هەمی تشتان بزانن پێدڤییە ب هەستەکێ بەرپرسانە و ب زمانەکێ سادە بەرسڤا پرسیارێن ئەوان بهێتەدان.

٣- گرنگییا یاریێ:یاری بۆ زارۆکان بتنێ بۆ دەم بۆراندنێ نینە بەلکو ڕێکەکە بۆ فێربوون و دەربرینا هەستێن خۆ،گرنگە دەلیڤە بۆ زارۆکان بهێتەدان کو یاریێن جۆراوجۆر و مفادار ئەنجامبدان.

٤- هەست ب ئەمانەت و پشت ڕاستیێ:زاۆک پێدڤی ب هەستکرنا ب ئەمان و پشت ڕاستیێ هەیە ژلایێ خێران و قۆتابخانەڤە داکو بشێن ب ئازادی شیانێن خۆ دیارکەت.

* باشترین ڕێکێن پەروەردەکرن و ئاخڤتنێ:

١- زمانەکێ سادە و ئەرێنی:پێدڤییە دئاخڤتنا دگەل زارۆکاندا زمانەکێ سادە و ئاسان بهێتە بکارئینان و گۆتنێن ئەرێنی و هاندەر بهێنە گۆتن ل شوینا ڕەخنەگرتنا بەردەوام هەول بهێتەدان ڕەفتارێن ئەوان یێن باش دەستنیشانبکەن و پەسنا ئەوان بکەن.

٢- دانانا ڕێسا و سنۆران:گرنگە ڕێسا و سنۆرێن ئاشکەرا بۆ زارۆکان هەبن،داکو بزانن چ تشت ژ ئەوان دهێنە خواستن و چ تشت قەدەغەیە ئەڤ چەندە هەستا ب ئەمان و ئارامیێ ل دەڤ ئەوان پەیدادکەت.

٣- گۆهداریکرنا چالاک:دەما زارۆک ئاخڤتنێ دکەت،ب دل و جان گۆهدارییا ئەوی بهێتەکرن و هاول بهێتەدان کو ژ هەست و ڕامانێن ئەوی تێبگەهن،ئەڤ چەندە پەیوەندییا دناڤبەرا مرۆڤی و زارۆکیدا ب هێز دئێخیت.

٤- هاندانا خواندنێ:خواندنا چیرۆک و پەرتۆکان بۆ زارۆکان هزرا ئەوان بەرفرەهــ دکەت و حەزا ئەوان بۆ فێربوونێ زێدە دکەت.

٥- فێرکرنا بەرپرسیاریێ:کارێن بچوویک و گۆنجای دناڤ مالدا پێ بهێنە سپاردن وەک کۆمکرنا یاریێن خۆ یان ئاڤدانا گۆلان ئەڤ چەندە هەستا بەرپرسیاریێ ل دەڤ ئەوان زێدە دبیت.

* ڕۆلێ دایک و بابان د پشتەڤانیکرنێدا:

١- پەیوەندییا بەردەوام دگەل قۆتانخانێ:گرنگە دایک و بابان ب بەردەوامی سەرەدانا قۆتابخانێ بکەن و دگەل مامۆستایان د پەیوەندیێدا بن داکو ئاگەهداری ئاست و ڕەفتارێن خۆ بن.

٢- دابینکرنا ژینگەهەکا ئارام:ژینگەها مالێ کارتێکرنەکا مەزن ل سەر دەرون و فێربوونا زارۆکی هەیە،لەورا پێدڤییە ژینگەهەکا ئارام و دوور ژ کێشە و ئاریشە بۆ بهێتە دابینکرن.

٣- هاریکرن دکارێ مالێدا:بێی کو ئەرکێن ئەوان یێن قۆتابخانێ بۆ ئەنجامبدەن،هاریکارییا ئەوان بکەن و ڕێنمایان لێ بکەن داکو بشێن پشت بەستنێ ل خۆ و کارێن خۆ بکەن.