د. کاروان صالح – زانکۆیا زاخۆ

هەلبژاردن ڕێکەکا شارستانی و دیموکراسینە خەلک پێ ڕایا خۆ بۆ یێ بەرامبەر دیاردکەت و نیشا ئەوی لایەنی یان کەسی ددەت ئەوان باوەریا خۆ دایە ئەوان داکۆ نوونەراتیا ئەوان ل ئەوان دەزگەهان بکەن و بەرەڤانیێ ژ مافێن ئەوان لدۆیڤ ڕێسا و یاساێن ئەوی وەلاتی بکەن.
هەلبژاردنێن پەرلەمانێ عێراقێ بۆ کوردان گەلەک گرنگن، هەر کورسیەکا زێدە بۆ کوردان واتە زێدەبوونا هێزا کوردانە بەرامبەری هێزا شیعەێن شوفینی و ڕەگەزپەرست، لەوڕا پێدڤییە تاکێن کوردی هزرێ ل پاشەڕۆژ و هێزا نەتەوەێن خۆ بکەن و ب شێوەیەکێ بهێز بەرەڤ سندۆقێن دەنگدانێ بچن، چونکی چەند هێزا کوردان ل بەغدا بهێز بیت دێ پێنگاڤێن لایەنێن سیاسی یێن عێراقێ ب دژی کوردان لاواز بن، ژبەکو ئەو نەشێن لدۆیڤ ئارەزۆیا خۆ یاسایان ب دژی کوردان ب سەپینن.
سەرەڕای ڕەوشا ئابووری یا نەخۆشا کوردستانێ پێدڤییە هرز لهندێ بکەن، نەچوونا ئەوان بۆ دەنگدانێ دێ پتر ڕەوشا کوردان نەخۆش بیت و دێ باڵا دەستیا بەغدا ل سەر کوردستانێ زاڵ بیت و دێ پتر ب دژی کوردان ڕاوەستیت، لەوڕا پێدڤییە گەلەک ب هشیاری بەڕێخوبدەین هەلبژاردنێن عێراقێ، چونکی هەلبژاردنێن عێراقێ و بدەستڤەهینا کورسیان ل پەرلەمانێ عێراقێ واتە ڕەوانەکرنا هێزەکا خوەگوڕکەر و داکوکیکەرە ژبۆ دیارکرنا هەبوونا کوردان دناڤ وەلاتێ دەستکردێ عێراقێدا و ڕاوەستاندنا هێزا تەپەسەکرن و داگیرکرنا گوندێن کوردستانێ یە. لەوڕا هەر دەنگەک دێ قەبارەکێ هێزێ ددەت پێگەهێ کوردان ل عێراقێ و مافێن کوردان دناڤ دەزگەهێن کارگێری یێن عێراقێدا زێدەکەت و هێزا شوفینیان بەرامبەری کوردان لاواز کەت.
پێدڤییە ب ئەرکەکێ نەتەوەیی بەرێخوبدەین هەلبژاردنێن عێراقێ، ژبەرکو ب ئەڤان هەلبژاردنان دێ هێزا کوردان بیت کەتوارەکێ دیار بۆ بەغدا و نەشێت چ پێنگاڤێن دژایەتیکرنا کوردان باڤێژیت و زێدەتر دەڤەرێن کوردان داگێر ناکەت.
ئەڤجا پێدڤییە ئەڤی ئەرکی ب دروستێ جێبەجێبکەین و پەیاما خۆ یا نەتەوەیی بگەهینین بەغدا و بێژینێ ئەڤە هێزا کوردایە و کورد نەبتنێ ب چەکی خەباتێ بۆ مافێن خۆ دکەن، بەرۆڤاژی دخوازیت ب دیموکراسی و ئاشتیانە بڕێکا هەلبژاردنا مافێن ئەوان بهێنە دابینکرن.