ئارام دهۆکی – کەنەدا

گەلەک جهێ خەمێیە کو د رۆژا ئەڤرودا و بتایبەتی کو رێژا کوردان زێدەبی لدەرڤەی وەلاتی. کوردا بگەلەک رێکێن جدا جدا حەزکرن کو کومەلەیێن جەماوەری ئاڤا بکەن دا کو بشێن دەنگ و رەنگ و کێشا چارەنووسازا کوردی پێ بینن زمان یا خۆد هەر چنە بە ئێکرێزیەکا کوردان بپارێزە بۆ رۆژێن پێتڤی. هەلبەتە کورد مینا مللەتەک بندەست ئالوزیێن سەرگرتنا ڤان کومیتان بساناهی نە بووینە ژ بەر گەلەک ئەگەرێن جدا. لێ ئەگەرەک هەرە سەرەکی هەردەم ئەو بوویە کو ئەو کەس و ئەندامێن تێن پێش یان ژ نەزانین یان ژی ژ زانینەکا بەرژوەند پەرێس تێنە پێش و هەردوو گرووپ ژی زیانەکا مەزن ل بەندێن یاسای یێن ڤان رێکخراوا ددەن و دیماهی گەل ل ئالایەکی دەستەکا رێڤەبەر لجهەک دن دمینە و کار هەموو لاواز دبن و گەلەک جاران د گەهە وێ ئاستی نەبوونا وان ژ هەبوونا وان باشترە. هەر کومەلە و کومیتەکا وەرە ئاڤاکرن ل وەلاتێن دیموکراتساز و یاسا یا تێدا بەرقەرار بۆ نموونە ولاتێن ئەورپی و ئەمریکا باکوور دڤێت هەر چ نەبە کومەلە وەرە تومارکرن و یاسایا خو هەبە و هەر سال جارەکێ کومبوونا خۆیا گشتی ئەنجامدە بۆ بەردەوامیا چەسپاندنا بنەمایێت یاسای و دیموکراسی بئەنجامدانا هەلبژارتنێت نوو. گەر ژ نێزیک ل کومەلە و رێکخراوێن کوردی بکەین دێ بینین کو پیتە دان بڤان خالێن سەرەکی ناهێت دان. بۆ نموونە کەسانێن رێکخراو ئاڤاکری یان گەهشتیە جهێ بەرپرساتیێ دخازە ئەو جه ژێ نەچە ئەڤجا ئان بنەئەنجامدانا کوومبوونا گشتی و نە ئەنجامدا هەلبژارتنان بۆ دەمێن هەرە درێژ. یان ژی ئەندام هەنە وێ کومبوون و هەلبژارتنان بانگکەن بەس بهەر رێکەکێ بە وێ بەردەوام بمینە د ناڤا دەستەکا رێڤەبەر و ئەڤجابۆ نە خەمە گەر پەنایێ ببە بەر تەزویرێ یان ئەندامێن خێزان و مالباتا خۆ بکار بینە بۆ ئینانا دەنگان هەتا د گەهە رادەکی ئێدی دلێ ئەندامان ژ ڤێ پروسێسێ ساربە. نموونەک دن ژ نەرێڤەچوونەکا تەندروستا رێکخراوان ئەوە ژمارەک نە کێم وەسان لێ دنێرن کو دەما ببن ئەندامێن کومیتەیان وێ پارەکێ مەزن ژ دام و دەزگەهێن حکوومی وەرگرتن و خو پێ زەنگین کەن وەکو گەندەلەکی بیر لێ دکەت یان ژی وێ بۆ بەرژوەندیا خویا کەسوکی بۆ پێشکەش کرنا پروگرامێن دەراڤ پێڤەتێت و…..هتد. هەلبەت ئەڤ جورە بیروکە و هاتنا پێشا ڤان توخمە کەسان زیانێت زۆر د گەهینن رێکخراوێن جەماوەری ل دیاسپورا و هەموو تەخا مشەختان. هەر ژ بەر ڤان بیروکا دێ بینی پرانیا کومەلا ژیێ وان یان یێ کورتە یان ژی ژمارەک کێم ل گەل ئێک دمینن و بەرهەمەک بەرچاڤ پێشکەشی ئەندام و لایەنگیرێن خۆ ناکەن ئەڤە ددەمەکیدا کورد ژ هەموو مشەختەکی پتر پێتڤی بئاڤکرنا کومیتانە ژ بەرکو ملەتەک بندەست و سەر لێ شێواوە، ژ بلی بدەهان پروگرامێن وان ولاتان هەنە د خزمەتا مشەختان دا هەنە نەمازە یێ تازە گەهشتین لێ ژ بەر کو کومەلە و رێکخراوێن کوردیێن مە نە ل ئاستن و کەسێن خودا شیان و پاک و تەمیز تێدا دکێمن شیان و حەزا وان نینن، ئەڤ کارە ئێدی کارکرن لسەر نینە. پرانیا باژێرێن کورد لێ پتر ژ کومەلەکێ یان چەندین کومەلا لێنە ئەڤجا گەلەک جاران ل شوونا ئەڤ کومەلە پێکڤە کار بکەن دراستیدا د ژاتیا ئێک د کەن لسەر بیروکێن بەرتەنگێن حزبی و ناوچەیی و لەهجەی و ….هتد. کورد ل دەرڤەی وەلاتی دەما بیر ل دامەزراندنا بنگەهەکێ فەرمی بکەن و کومەلەیا دابنن باشتر ئەوە بیربکەن کا ئەڤ کەسێن دێخین پێشیا خۆ وێ بکارن وەکو پێتڤیەکا یاسای ڤێ کومەلێ دوور ژ بیروکین کەسوکی و ئایدولژیێ پارتایەتی و ئۆلی و ناوچەگەری و….هتد برێڤەبەن و ئاستێ رێڤەبرنا کومیتێ هەیە وەکو ستراتیژیەک دووم درێژ لسەر بنیاتەکی نەتەوی بخەبتەبن یان ژ وان توخمانە کو ژ پێخەمەتا بەرژوەندیێن خۆ وەکو خۆ کومەلەیێ برێڤەببە و ببە دکتاورەک لسەر پەیرە و پروگرامی هاتی نڤێسین و یاسا ژی وەکو حبرەکێ لسەر کاغەزێ بمینە.