ئاشتی پیرۆ

زاخۆ ژ هەموو ڕوویه‌كیڤه‌ به‌رده‌وامه‌ د پێشكه‌ڤتنێدا, ئێک ژ سێكته‌رێن دی یێن ئیداره‌یا زاخۆ گرنگی پێدایی ئه‌وژی لایه‌نێ ڕه‌وشه‌نبیری و پێگه‌هاندنێیه‌, ئه‌ڤرۆ ژی ب خوشحالىڤه‌ ئه‌م دبینن ئێکەمین پێشانگەها ناڤدەولەتییا پەرتووکان ل زاخۆ هاتییه‌ ڤه‌كرن, ب حوكمێ ئەوێ چه‌ندێ د شه‌ش سالێن ڕابردوو دا ل زانكۆیا زاخۆ مه‌ سالانه‌ پێشانگه‌هێن په‌رتووكان ل سه‌ر ئاستێ ناڤخۆیی ڤه‌كرینه‌ ب راستی ژی زاخۆ ئێک ژ ئەوان باژێرانه‌ كو، ژماره‌یەكا هه‌ری باش یا خوانده‌ڤانان تێدایه‌ و داخوازیه‌كا باش ل سه‌ر په‌رتووكان هه‌یه‌ له‌وڕا ژی، ئه‌ڤرۆ ڤه‌كرنا ئەڤێ پێشانگه‌هێ پێنگاڤه‌كا هه‌ری گرنگ و دلخوشكه‌ره‌ ژبۆ خوانده‌ڤانێن ده‌ڤه‌را بهدینان ب گشتی و زاخۆ ب تایبه‌تی.
هه‌روه‌سا، ئه‌ڤ پێشانگه‌هه‌‌ زورا گرنگه‌ ژبۆ ماموستا و قۆتابییێن زانكۆیێ كو ده‌رفه‌ته‌كا زێرینه‌ بشێن برێكا ئەڤان وه‌شانخانه‌ و پەرتووکخانەیێن به‌شدار ب ساناهیتر ژێده‌ران ب ده‌ستخوڤه‌ بهینن كو، زێده‌تری بیست هزار ناڤ و نیشانێن جودا ب زمان و بوارێن جودا جودا دا د ئه‌ڤێ پێشانگه‌هێ دا هاتینه‌ پیشاندان, هه‌روه‌سا پێنگاڤه‌كا گرنگه‌ كو خه‌لكێ ده‌ڤه‌رێ پتر ئاشنایی خۆاندنا په‌رتووكان بیت, و بێگومان خواندنا په‌رتووكێ ئێک ژ خالێن هه‌ره‌ گرنگه‌ كو جڤاک ژ ڕوویێ ڕه‌وشه‌نبیریڤه‌ پێشكه‌ڤتنێ بخوڤه‌ ببینیت.

ده‌ست خوشییێ ل ئیدارەیا سه‌ربه‌خۆیا زاخۆ دكه‌ین و داخوازا سه‌ركه‌ڤتن و پێشكه‌ڤتنێن به‌رده‌وام  ژبۆ زاخۆ دخوازین.